A regord de la Fernanda

Poesie

Ciao Fernanda, incoeù l’è staa el primm lunedì senza de tì,

te confessi che la toa assenza in tucc numm

de la compagnia del bridge, l’è stada avvertida,

tucc gh’emm avuu on penser,

a mì me mancaa el tò salud el tò sorris.

Me vegnuu in de la ment quand per la toa dipardida,

hoo sentii l’òmelia del cugnàa prevòst, quanto me son commòss…

commòss anca per i bej paròll del Fabio tò marii,

de quij dei tò fioeù, de la bella melodia ben sonada

da on nevod musicista cont tant de violin, che magon mì pòr tappin...

La Gesa l’era strapiena e minga domà de quij del bridge,

ma de tanta gènt per ben, che t’hann regordaa con tanti battiman.

Mì son sicur che lì in Paradis, come te fasevet con mì,

el bridge te le insegneree a quij che gh’è lì.

Mi voeùraria però, che el Fabio tò marii,

e quest quand lù l’avrà decis, el vegniss anmò chi con numm al lunedì,

per giugà e stà in nostra compagnia, e mì…. pensà a tì,

specialment quand gh’era de calmamm,

da la “Marescialla” e dai sò vusadd.

Fernanda tucc numm la tegnom in de la ment,

la toa amicizia, la toa calma i tò suggeriment,

adess riposa in pas, da tucc numm tanti salud,

faa cont el coeùr in di man,

come se dis e se usa in del nòst…Milan!

Milan, 28 otober 2019 Vun del bridge (Carlo Biaggi)