Dopo on ann de bridge a la Pecetta

Carlin...i novità de 'sti ultim temp con la compagnia del bridge alla Pecetta hinn,
che la Nuccia “rasòterra”, la Giusy e quella del cappellin, vegnen pù,
la “Rommel” a differenza de prima, ultimament ona vòlta sola la m'ha mandaa a da via el cuu,
la me da sì del teston però in compens l'ha dii che son diventaa on cicinin pussee bon,
mi disi che el merit in part l'è staa anca del m'è amis Giacom che con mì el fà el socio,
l'è vun di noeùv arrivaa chi alla Pecetta l'è bravo in del gioeùgh, nient el fà in fretta,
l'è semper pazient in del damm i suggeriment a differenza de la “marescialla”,
noeùv hinn anca l'Anna e la Lalla, amiss dei dò dònn che hoo conossuu a Porto Santo in
Portogall, i hoo conossuu durant ona esibizion de ball, de come ballen el saria mei parlann nò,
hinn come duu sopramòbil sul comò, però in del bridge arriven quasi semper primm...Carlin,
de nòmm fann Susanna e Marilena, già che quand vann in di Wòrshòp a tavola ghe dann
denter de bònna lena, vann perchè speren de troeùvà el soo simpatich “marcantòni” Zappalà,
tramite lor s'hinn aggregaa alter bravi giùgador, gh'è el Luis cantant del coro de San Felis
e la simpatica còppia Fabio e Fernanda, dalla giugada alla granda, quand però tra de lor in de
la manada famm minga la vusada, tucc s'hinn ben inserii in de la già collaudada compagnia,
de questi ringrazzi l'Emma e la Pòlda che ghe stann 'dree a numm de la giùgada stòrta.
Adess l'Angela l'è pussee considerada e la Vanda di vòlt la ven giò dalla pianta, l'è semper on
poo stranulada scapigliada e con l'Oberto “ragionàtt” arrabbiada, specialment quand lù con
cart bon in di man el finiss minga la giùgada, “el ragionàtt” con mì dopo che hoo dii el nòmm
del soeù sitò, soeu minga perchè ma quand el fà i cont, el me mett in classifica semper in fond,
el Luciano invece l'è vendicativ di vòlt el 'riva tra i primm, però l'è domà peccaa Carlin,
che come tant'alter el gh'ha cort el...bràscin.
La Daniela simpaticòna in del gioeùgh l'è bònna, e...anca bònna, l'è semper come al sòlit
infolarmada in del bridge, menter quand la balla semper ma semper la rid, l'è de Milan,
ma quand la parla e la legg el milanes, che...frana mama, l'è pegg d'on...“giargianès”
Ona noeùva arrivada l'è anca la Grazia, brava calma elegant cont on fà sul regal,
compòsta come rango compòrta, accattivant e per i mè battut l'è tollerant, la Giovanna come
semper l'è semper sorrident, lee la me comprend quand di vòlt ciappi dalla “marescialla”
girad per nient, la Pinuccia invece semper la me dis che in del ball la voeùr minga quij
cont i cavei bianch, e anca in del bridge prima de giùgà con lee gh'hoo de studià la metrica,
mì chì de rimand ghe disi Pinuccia damm a traa, chì non mi vuole non mi merita,
ciappa sù e pòrta a cà, Marilena t'el pòrti chì el Zappalà, va ben? la Marisa adess l'è rilassada
da quand l'assenza de la “marcantòna” Brunilde la ghe da pù in de la giùgada de l'imbranada.
Per finì ringrazzi tutta la compagnia che me supporten in di me battut in allegria,
a la Emma ghe disi dai guarda nò tusscòss l'ann che ven te prometti che studierò on quij còss,
per adess ciappii per finì tanti auguri de Bon Natal e Bon Ann,
con la speranza ch'el sia per tucc on Ann seren e senza malann,
auguri faa da on bon pòcch giùgador de...Milan!

Carlo Biaggi

Milan dicember 2012