Penisola Sorrentina

Il Vesuvio di Carlo

Il Vesuvio di Oberto

Amalfi

Positano

Sorrento

Napoli e la costiera amalfitana
Hotel Colli San Pietro (Sorrento) 22-25 maggio 2013

Carlin se dis: “pòcch ma bon” e numm s'erom quatter còppi cont in pù el mè coscritt
“el lunga ragionatt” del bridge, quanto bell giraa emm faa a Napoli e in de la Penisola
Sorrentina, l'Hotel l'era el Colli San Pietro de l'Annamaria, situaa sù la collina de
Sorrento, hotel carino bell 3 stell, con vista del mar e del Vesuvio Vulcan.
El viagg l'emm faa in treno con la Frecciarossa comod rilassant e giugada de cart,
in stazion emm troeùvaa la Valeria carina brava come guida, subit emm visitaa de
Napoli el Dòmm de S. Gennaro, la Spaccanapòli e la Cappella de San Severo con la
meravigliosa statua del Cristo Velaa fada in del 1753 dal Giusepp Sanmartin cont in
pù la ret de marmo del Disingann scolpida per coprì...el bamborin, che bei...Carlin,
sta Cappella l'è propri bella come l'è staa bon da Scaturchio el caffè e la sfògliatella.
El dì dopo Positano l'è staa la meta, cittadina favolosa con viett e negoziett a portada
de man ma con prezzi on poo alt, i cà tutt bianc istess d'on preseppi e elegant.
El disnaa l'emm faa a Amalfi la prima repubblica marinara, bell el Chiostro
ripristinaa e el Dòmm con tant de scalinada, in del tornà su la strada piena de curv de
la Costiera Amalfitana che paesagg i calett sul mar e che bell preseppi gh'era in del fianc.
La visita della bocca del vulcan l'emm saltada gh'era on frecc de can ai 1000 meter del
Vesuvio, però la camminada in discesa l'emm fada istess e inscì pian pian semm
arrivaa al Pastificio Leonessa doe temp fa hoo faa ona promessa,
l'era che dovevi ritornà ancamò, perchè l'era che chì in tavolada anmò me saria setagiò.

Prima però da l'Oscar dottor emm sentii el sermon, per chì la mai sentii l'è staa anca
interessant: “la forma de la pasta si fa con la spinta della vite senza fine nella trafila di
bronzo o di teflon, noi” el continua lù, “siamo all'avangurdia nel curare l'essicamento
mantenendo l'umidità della pasta al 14 per cento, sia del grano tenero che di quello duro
e questo è sicuro”, e via inscì, ragazzi che pistolòtt poo con tant de cuffia e camisòtt emm
visitaa l'impiant dei subiòtt, alla fin però i emm mangiaa spaghett e subiòtt e che...bontà.
Alla sira giro pizza con specialità della cusina napoletana, tarantella con balli e canti,
segon tamburell “tricchebarracche” e dò còppie in costum 'me ballerin, che sudada...Carlin,
tucc s'hinn da de fà, anca se la ”Lollo” Caterina cont el Giusepp sò marii prima de partì
cunten vun duu trii, s'hinn esibii per festeggià l'anniversari el “Papa” Franco “brontolon”
con la simpatica Giovanna soa sposa cont on ball de la piastrella, menter “el lunga” semper
lì settaa a fà cadrega come on grimett in del fà foto ai ballerin dai bei...tett, anca la
Marisa “mudandera” e l'Alida in staa serada bella gh'hann daa denter con la tarantella.
L'ultim dì l'emm passaa in del visità Sorrento, la Gesa del S. Antonin, de stò Sant la Valeria
la gh'haa spiegaa che la salvaa dalla balena on fiolin, sì...Carlin, poo emm giraa per el centro
storico, vist la cà doe l'è nassuu el Torquato Tasso vist anca el bell Hotel Vittoria del Caruso,
chì el Lucio Dalla el gh'havuu l'ispirazion de scriv Caruso come canzon che...canzon.
Per finì gh'hoo de dì che per mì 'sti quatter dì in andaa pussee che ben, a part el temp,
che però rispett a alter region e post numm in del nòster girovagà emm vist tusscòss,
magari minga con semper el cald e “o sole mio Napolitan”, ma emm troeùvaa tanta simpatia
e del bon mangià e che caffè da Gambrinus emm proeùvaa, l'è vera o nò damm a traa.
Adess ve saludi cont on arrivederci a prest, con tanti auguri de ogni ben,
auguri faa, dimm a traa, col coeùr in di man, dal Biaggi de....Milan!

       El cap grupp (Carlo Biaggi)