Con la compagnia del bridge

Carlin...questi hinn i mee impression che chì a la Pecetta foo sul gioeùgh del bridge,
hinn come al solitt i mee righ tra giò senza pretes e ditt hinn milanes,
anca se ormai a Milan purtròpp hinn pussee de numm i “giargianes”,
e anca chichinscì se tutt va ben de Milan sont domà mì.
L'è on bell gioeùgh el bridge, el fann seriament in silenzio senza rid,
mì disi la verità son minga bon anmò de mettel in de la ment, vari pròppi nient, però
insisti istess almen per adess, perchè chissa se dopo 'sti 4 righ me farann giugà ancamò,
a mì 'stò gioeùgh el me pias, e poeù dai l'è bella la compagnia, cont l'Oberto me coscritt
bravo e semper primm, in del preparà tutt l'ambaradan e stilà tant de classifica final
e progressiva inserida poeù, in del sò sito che l'è de lù: “www.elghetira.pù”.
L'insegnant l'è la simpatica Emma dal caratter fòrt, per mì “marescialla” quanti girad
semper la me dà:“sei un testone il contro si fà con l'apertura e con la regola del sette,
l'intervento è con 5 carte, devi giocare subito le atout, sei on...è meglio che tu vada a....”,
e via inscì pù o men tucc i lunedì, me immagini i sò pòer alliev 'me staven in campana
con 'sta “marescialla”, chì con numm gh'è anca la simpatica Giovanna, semper sorrident,
la soa socia l'è la Pinuccia, carina nient de dì, però che peverina, lee la gh'ha semper quij de
la via De Amicis in de la ment, la dis lì e poeù pù, per mì l'è mei chì anca se ogni tant la “m...
la me manda “a da via el cuu”, la Marisa invece la diss mai nient, anca quand l'altra maestra
Brunilde soa sòcia “soldato marcantòna”, la ghe dà de la rattòna, calma brava la Nuccia
“rasoterra”abbronzada 'me el Conti e l'Obama, brava e carina l'è la Giusi ultima arrivada.
La Daniela “napoletana” adess l'è abbastanza rilassada però l'è infolarmada per fà la miglior
giugada, lee la gh'ha minga in ment via De Amicis dersett e vardila 'me l'è carina e che...tett,
l'è semper insemma al Luciano che per cercà el fit el salta i regol del bridge, el fà la regola dei
trii bussolòtt, in dei bòcc l'è el “maester”, anca se tucc ghe dann a 'dòss e ghe dann del bròcch.

Gh'è on'altra Daniela “cicca americana” che con l'Anna hinn simpatich e ona bella còppia,
la Silvia l'è semper tranquilla e semper in còppia cont “l'oeùv de Pasqua” Giann, lù l'è el
nòster coordinador, con mì el fà el“professor” de tusscòss, forse de nagòtt, del bridge dei
bòcc del ball anca in del dialett de Milan, per mì l'è on “posapian” s'el te taccà on botton che...,
ma l'è mei tegnil bon perchè lù tra i alter tanti “ball” l'ha faa anca arti marziali “taslìgiann”,
di vòlt cont on original cappellin gh'è la Luciana...Carlin, gh'è la Vanda dal vosin da poresin,
che la te guarda on poo stranulada, “ven giò da la pianta che la guerra l'è finida” disi mì,
l' Angela gh'è chì, lee i regol i a sà, però troppa paura la fà la giugada, e per ona carta minga
indovinada da la “Rommel” che vosada:“dove vuoi andare con quelle carte lì,nò nò non si
gioca così, questa carta devi giocare, testona”, ghe ven el magon lee l'è bòna, de vosad però
ne ciappi pussee mì, donca guarda nò tusscòss, mì dopo la sfuriada, “da lee salvom mama”.
Purtròpp chì tra numm ghe ne manca vùn, ona brutta malattia
che nissun perdòna l'ha porta via, lù el Moreno in del gioeùgh del bridge l'era bravo,
el m'ha semper aiutaa con consilli giust, adess...e chì son sicur,
pensi ch'el sia content che la soa simpatica miee la sia tornada con numm indree,
come son sicur che la in Paradis l'è 'dree a insegnà ai bon pòcch el bridge,
de come fà el barrage, la stayman el rever el cuntra spuntich o el slam con l'atout de picch,
Moreno da tucc numm te se semper in ment, on penser, adess lì cont i Sant ripòsa in...pas.
Per finì 'sta mia tiritera, ringrazzi l'Emma con la stima pussee sincera,
con tanti salud e auguri a tucc de Bon Natal e Bon Ann,
auguri faa verament cont el coeùr in di man, come se diss e se usa in del nòst...Milan!

On milanes present (Carlo Biaggi)

Milan, dicember 2011